PREMIOS MONTESÍN DE LLITERATURA
INFANTIL Y XUVENIL

(que se convoquen dende 1994 con carácter bienal)
Esti premiu «Montesín» convócalu Ediciones Trabe comu homenaxe doble: al llibru clásicu que da títulu al premiu y a la colección y a la so autora, María Josefa Canellada.

Un carbayu cocoteru

Enrique Carballeira

Dibuxos a color del autor
64 páxines
12 x 19 cms.
PVP: 750

Esti llibru ganó en 1995 el premiu MONTESÍN de lliteratura infantil.
El xuráu que lu concedió taba formáu por Severino Antuña, María Xosé Díaz Sordo y Félix Ferreiro Currás.

La vida tranquila de Villa Marina vese alborotada por un fechu insólitu: un carbayu qu'hai na Llomba ponse a dar cocos. El mundu enteru movilízase: la tele, curiosos, científicos... Pero va facer falta que dos rapazos del pueblu, Quique y Quecu, se apongan a investigar pa qu'escample'l misteriu.
Enrique Carballeira nació nel Infiestu en 1970. Trabaya na radio. Tien publicaos munchos llibros pa nenos, nos que ye autor del testu y de los dibuxos. Tamién fai cómics.

Morfema, mormefa, mormera...

Carme Martínez

Dibuxos de l'autora
56 páxines
12 x 19 cms.
PVP: 850

Fuen, Dani, Enol, Dela, Xuanín... son dalgunos de los protagonistes de cada ún de los capítulos que formen esta pequeña novela, que xira alredor de la escuela.

Pero tamién tán equí García Lorca y la guerra o la carabela la «Pinta»...

Carme Martínez nació en Xixón en 1955. Ta Llicenciada en Lliteratura Española y ella mesma fai los dibuxos de los sos llibros.

Ganó'l Premiu «Montesín» de Lliteratura Xuvenil de 1996 col llibru Cuentos pa una nueche ensin lluz, tovía ensin publicar.

PREMIOS DE NARRACIONES TRABE

(que se convoquen anualmente dende 1992)

Histories d'un seductor
[Memories d'un babayu]

Miguel Rojo

192 páxines (Novela)
13 x 20 cms.
1.525 ptes.

Esta novela ganó'l Premiu de Narraciones Trabe 1992 d'alcuerdu col fallu qu'emitió'l xuráu que formaben Xenaro Alonso Megido, Félix Ferreiro Currás, Francisco García Pérez, José Antonio Martínez y MilioRodríguez Cueto.

Histories d'un seductor (memories d'un babayu) ye una crónica sentimental, un relatu nel que los acontecimientos históricos nun tienen el protagonismu. Son namás la marcación na que se desenvolubra la vida amorosa de P. R., el protagonista y narrador.

Escrita comu si fueren unes memories, narra con desenfadu les relaciones coles muyeres importantes na so formación: la madre, les compañeres de xuegos infantiles nada inocentes, la escuridá aprovechable de los cines, la vecina, l'amante comunista de finales de los sesenta, la casada infiel, les virxes, la muyer, el divorciu... L'autor consigue asina una novela divertida y instructiva, actual, onde alternen humor y traxedia, amor y sexu nuna espléndida y animada narración. Esta novela ye'l gran éxitu de llectores de la nuesa lliteratura.

Miguel Rojo (Zarracín, Tinéu, 1957) doctor en Ciencies Biolóxiques, tien publicaos dos llibros más: Asina somos Nós (Premiu Xosefa de Xovellanos de novela 1988) y el llibru de cuentos Tienes una tristura nos güeyos que me fai mal (1989), amás d'otros de lliteratura infantil y de poesía.

Los párpagos de Buda

Santi F. Ochoa

13 x 20 cms.
104 páxines (Novela)
1.050 ptes.

Esti llibru ganó'l Premiu de Narraciones Trabe 1993 d'alcuerdu col fallu qu'emitió'l xuráu que formaben Xenaro Alonso Megido, Félix Ferreiro Currás, Francisco García Pérez, José Antonio Martínez y Milio Rodríguez Cueto.

Atrás van quedando aquelles coses que dalguna vez pudieron importar; coses comu la xente, el sexu, el trabayu o la vida mesma... «La droga ye'l principiu y la fin de la nuesa vida social —diz Xuan, el protagonista mozu d'esta novela, siempre dispuestu a escandalizar—. La droga ye la nuesa ruleta rusa. Presta saber que pues quedar colgáu en cualquier llau.

Los párpagos de Buda, supón la estrena lliteraria (qu'ha resultar polémica, ensin dulda) de Santi F. Ochoa (Mieres del Camín, 1969). La obra, dura y ensin concesiones, d'aspectu autobiográficu y en tou casu instructiva, presenta retayos de la vida n'Antaxone, nome tres del que s'escuende una villa cualquiera, cualquier sitiu de les cuenques mineres.

Esa lluz que naide nun mata

Pablo Antón Marín Estrada

104 páxines (Cuentos)
13 x 20 cms.
1.350 ptes.

Esti llibru ganó'l Premiu de Narraciones Trabe 1994 d'alcuerdu col fallu qu'emitió'l xuráu que formaben Xenaro Alonso Megido, Félix Ferreiro Currás, Francisco García Pérez, José Antonio Martínez y Milio Rodríguez Cueto.

El cuentu, la forma narrativa que meyor ta retratando la sociedá asturiana d'anguañu, tien nesti llibru ún de los mayores llogros d'estos años: doce relatos escritos con precisión milimétrica, con maxistral cenciellez, doce escenes de la vida cotidiana onde lo maravioso se miez cola realidá de cada día. Los personaxes tán sacaos del mundu que nos arrodia: un entierru, un insumisu presu, una pareya homosexual, un solitariu, un home qu'acostina una camaleona pelos bares..., situaciones o xente que podemos tropezar en cualesquier momentu, pero que nesti llibru algamen una rara intensidá que llogra fascinanos.

Esa lluz que naide nun mata, Premiu de Narraciones Trabe 1994, confirma a Pablo Antón Marín Estrada (Sama Llangréu, 1966) comu ún de los escritores más orixinales y capaces d'esta lliteratura. Publicó los llibros de poesía Blues del llaberintu (1989), Les hores (1990) y Díes d'inocencia (Trabe, 1992) y el de relatos Xente d'esti mundu y del otru (1992).

La tierra entero

Berta Piñán

112 páxines (Cuentos)
13 x 20 cms.
1.150 ptes.

Esti llibru ganó'l Premiu de Narraciones Trabe 1995 d'alcuerdu col fallu qu'emitió'l xuráu que formaben Fernando Álvarez-Balbuena, Esther Prieto y Xulio Viejo Fernández.

Los dieciséis cuentos que formen La tierra entero, Premiu de Narraciones Trabe 1995, preséntense al llector comu un retratu plural de la experiencia humana, variáu tantu dende'l puntu de vista formal (relatos brevísimos que malapenes ocupen una páxina xunta cuentos yá más llargos) comu polos temes: la visión cariñosa y dura d'una sociedá rural que depicúa («Ñeva», «Paisaxe con figura», «Samartinu», «El Pindal»...), la violencia cotidiana de les relaciones humanes nuna sociedá que camina pel asfaltu («Atracu a mano armada», «El mundu ye un pañuelu»...), la convivencia difícil («Amnesia», «Relaciones prematrimoniales»...), pero too ello mirao siempre dende una perspectiva cotidiana y realista que dalguna vegada («L'airón del desiertu») se convierte en máxica.

«Paisaxe con figura» ganó primero'l concursu de cuentos Fernández Lema (1995) y sirvió más tarde (1996) comu guión pa un curtiu de televisión que tien el mesmu títulu.

Berta Piñán nació en Cañu, Cangues d'Onís, en 1963. Conocida y prestixosa poeta, xéneru nel que tien dos llibros publicaos (Al abellu les besties, 1986 y Vida privada, 1991), recueye nesti volume la obra escrita hasta'l momentu, que yá s'adelantara na antoloxía Muyeres que cuenten (Trabe, 1995).

1996

(Dexóse desiertu)