asturianu-castellanu, castellanu-asturianu

Xuan Xosé Sánchez Vicente
18 x 25 cms.
Tapa dura
574 páxines
5.975 ptes.

El Diccionariu Asturianu-Castellanu, Castellanu-Asturianu, de Xuan Xosé Sánchez Vicente, ye ensin dulda la obra más completa d’estes característiques de que puen disponer agora toles persones interesaes na llingua asturiana.

L’autor parte del so Diccionariu de la Llingua Asturiana, publicáu en 1988 y agotáu al poco, y añade alredor de cincu mil palabres nueves, completa les definiciones de les que yá tenía aquél, incorpora más frases feches y refranes y sinfinidá de sinónimos.

El resultáu ye esti gran diccionariu, el más completu y rigurosu, una ferramienta indispensable pal alumnu d’asturianu en tolos sos niveles, dende la enseñanza primaria a la especialización universitaria, pa los profesores, escritores o traductores, y en definitiva pa los que precisen trabayar cola llingua d’Asturies.

Pero ye tamién una obra de consulta imprescindible pal que tenga ensin más interés pola llingua asturiana y por conocer meyor la gran riqueza del vocabulariu asturianu. Non de baldre nesta obra s’ofrecen xuntos, trataos con rigor científicu y metodoloxía profesional, los repertorios clásicos de palabres asturianes, les fontes lliteraries y por supuesto la fala viva de güei.

Complétase con una importante novedá: un útil y prácticu «Índiz Castellanu-Asturianu» que va aidar a enriquecer el lésicu de los falantes asturianos y a resolver bien de duldes y de dificultaes.

Xuan Xosé Sánchez Vicente nació en Xixón en febreru de 1949. Ta casáu y tien tres fíos. Ye llicenciáu pela Universidá d’Uviéu, catedráticu de llingua y lliteratura (cátedra qu’algamó a los venticuatru años) y profesor nel institutu El Piles de Xixón.

El so trabayu muévese, siempre alrodiu d’Asturies, dientru de tres exes: el llabor políticu, el creativu y el d’investigación.

Ye presidente del Partíu Asturianista dende la so fundación en 1985. Dende 1991 ye diputáu nel Parlamentu Asturianu (la Xunta Xeneral del Principáu) por esta fuercia nacionalista.

Tien publicaos una novela, tres llibros de poesía, cuatru de narraciones, dos de teatru, cuatru ediciones de clásicos asturianos, cuatru d’ensayu y estudiu y, con esta edición, dos diccionarios. Tamién ye autor de desinfinidá d’artículos d’investigación y collaboraciones polítiques, lliteraries y llingüístiques en periódicos y revistes especializaes.

Ye ún de los más importantes escritores asturianos de güei.

Comu poeta publicó:

• Camín de señardaes (1980)
• Poemes de Xixón (1981)
• De reidores costes (1988)

Comu narrador:

• El comuneru (1979)
• Cuentos de llingua afilada (1984)
• La muerte amiya de nueche (novela, 1984)
• Lluna llena (cuentos, 1990)

De teatru:

• El Pelayo (1985)
• Esta danza ye la vuestra si ye que vos presta (1992)

D'ensayu:

• La cultura popular asturiana: unidá y pluralidá (1985)
• Mitoloxía asturiana y refraneru (1986)
• Crónica del Surdimientu (1975-1990) (1991)
• El hilo de Ariadna (1991)

Ediciones de lliteratura asturiana:

• Esvilla de poesíes na llingua asturiana, de Xosé Caveda y Nava (1979)
• Clásicos asturianos (1982)
• Clásicos asturianos, lliteratura relixosa (1983)
• Poesíes asturianes completes, de Xosé Caveda y Nava (1989)

En 1988 publicó'l Diccionariu de la Llingua Asturiana. Ye autor, tamién, de sinfinidá d'artículos publicaos en revistes y periódicos d'Asturies.

Ediciones trabe
Campu los Patos 3, 3º N
33010 Uviéu
Ap.- 1386
33080 Uviéu
Tlf. y fax: (98) 522 03 45