Catecismu del llabrador (1891)

Frai Verdaes

Prólogu de David M. Rivas
64 páxines
12 x 18 cms.
1.000 pesetes

En 1891 apaecía n'Asturies un curiosu llibru, el Catecismu del llabrador, firmáu col alcuñu Frai Verdades, que denunciaba asonsañando los populares catecismos de la fe cristiana la situación de probeza y marxinación secular de los llabradores asturianos. La censura de la Restauración prohibió aquel llibru, mandó retirar la edición y entá güei nun se conoz nengún exemplar. Ainda más: hasta hai venti años, que s'atopó un manuscritu, nun se conocía nin el textu. Sicasí, publicáu nun volume con más escritos del autor, siguió siendo una obra desconocida, y ésta ye la primer vez que se publica sola. Con ello queremos da-y el protagonismu que'l so tiempu-y negó.

El llector actual va sorprendese delantre d'una obra tremendamente crítica y lúcida, anticaciquil y moderna, que namás va perder actualidá cuandu desapaezan dafechu los llabradores.

Tres del alcuñu Frai Verdades escondíase Antonio Fernández Martínez. Naciera en Reinosa (Cantabria) n'avientu de 1860, estudiando en Santander y llicenciándose en Drechu Civil y Canónicu en Valladolid. Ente 1885 y 1886 dirixó'l selmanariu Apolo nesta ciudá. Hacia 1887 va vivir a Llanes al llograr el puestu de Secretariu del Xulgáu del Conceyu. Yá nun abandona l'oriente asturianu, morriendo na so casa de Porrúa en 1912.

Amás de publicar el Catecismu del llabrador en 1891, en 1892 asoleyó Pinceladas: cuadros de costumbres. Descripciones y leyendas de la zona oriental de Asturias, que se reeditó, con dalgunos escritos más, en 1986.

Poesía (1976-1996)

Manuel Asur

208 páxines
14 x 21 cms.
2.100 ptes.

Manuel Asur (La Güerta, 1947) publica en 1977 el primer llibru del Surdimientu asturianu, Cancios y poemes pa un riscar, anunciando una nueva época pa esta lliteratura, que tuvo continuidá al añu siguiente con Camín del cumal fonderu. Nellos la poesía social, comprometida, alterna con una obra más intimista, amorosa. Nos años setenta dalgunos de los poemes más combativos, musicaos por Nuberu, algamaron una popularidá inimaxinable nun poeta asturianu, convirtiéndolu nel autor más representativu d'aquellos años, puntu de referencia pa les nueves xeneraciones d'escritores.

A partir del llibru tituláu Vívese d'oyíes, de 1979, y especialmente na primer mitá de los ochenta (cuandu publica Congoxa que ye amor en 1982 y Destruición del poeta en 1984) la so poesía afonda na llinia intimista, faise más reflesiva, abriendo depués un llargu paréntesis namás rotu pola publicación circunstancial de poemes que'l propiu poeta considera menores y que se publiquen equí col títulu xenéricu de «Cantarinos de caleya».

Poesía (1976-1996) recueye la obra más representativa de Manuel Asur. La selección de los testos (les inclusiones y les ausencies) y l'orde nel qu'apaecen son responsabilidá del poeta. Tamién-y correspuenden a elli dalgunes diferiencies que topará'l llector atentu en dellos versos ente les primeres ediciones y la que s'ofrez equí.

Con esti llibru recuperamos la voz d'un autor esencial del nuesu tiempu. Equí tán xuntos venti años de la poesía asturiana más reciente.

Un tiempu meyor

Pablo Antón Marín Estrada

80 páxines
14 x 20 cms.
1.100 ptes.

La infancia feliz que sirvía al poeta comu materia lliteraria nel llibru Díes d'inocencia (númberu 2 d'esta mesma colección) atopa n'Un tiempu meyor la correspondiente réplica: aquellos años teníen díes d'otramiente: «...zones escures,/ hubo sombres/ nesa fiesta/ qu'inda güei te respiguen.»

Yera un tiempu de vida nel que tamién se deprendía a convivir cola muerte, cola violencia, coles primeres frustraciones...

Pablo Antón Marín Estrada nació en Sama Llangréu en 1966. Tien publicaos tres llibros de poemes (Blues del llaberintu, 1989; Les hores, 1990 y Díes d'inocencia, 1992), dos de cuentos (Xente d'esti mundu y del otru, 1992 y Esa lluz que naide nun mata, 1995, premiu de narraciones Trabe) y unes páxines de diariu (Agua que pasa, 1995).

Ámbitu elemental

Humberto González

40 páxines
14 x 20 cms.
1.100 pesetes

Humberto González (Figareo, Mieres, 1961) ye autor d'otros tres llibros de poemes: Augua d'invocación (1988), Poemes en prosa (1992) y Hábitat azul (1995). Amás de dalgunes traducciones y artículos en prensa y revistes, publicó un llibru de cuentos, Anatomíes de la mañana y otres histories escabroses (1995).

La so obra poética, caracterizada pola riqueza léxica y la complexidá sintáctica, y centrada na recordanza erótica y amorosa, ta recoyida na mayor parte de les antoloxíes dedicaes a destacar lo principal de la poesía asturiana última.

Entre apigarzos

Nené Losada Rico

80 páxines
14 x 20 cms.
1.490 pesetes

En 1992 publicó Nené Losada Rico (nacida en Lluarca en 1921) el so primer llibru, Cantares valdesanos, onde conxugaba a la perfección una tradición oral, popular, cola tradición lliteraria, humorística, tan riques les dos nesta llingua.

Esti llibru, Entre apigarzos, supón un cambiu radical na so producción: un llibru de poemes escritu a lo llargo de los últimos cinco años onde destaca la brevedá de les composiciones, a vegaes cercanes al minimalismu, que dan forma a un pensamientu fondu, cásique una crónica del sentimientu, too ello ensin perder la cenciellez y el precuru que, popularizó la obra d'esta destacada poeta asturiana.

Memories d'un nenu llabriegu

Xosé Neira Vilas

Traducción del gallego de Xandru Fernández
96 páxines (Novela)
13 x 20 cms.
1.390 pesetes

El protagonista d'esti llibru ye Balbino, un nenu probe gallegu, fíu de llabradores que trabayen les tierres del amu. Pero bien podía ser cualesquier nenu asturianu de la primer mitá d'esti sieglu. Ye'l propiu Balbino'l que va contando, con cenciellez y aciertu, con conciencia de clase, el so mundu rural, la miseria (física y espiritual) que lu arrodia, cómu la sociedá que conoz ta dividida en dos clases irreconciliables (los que manden y los qu'obedecen), o cómu la emigración ye la única salida.

Memories d'un nenu llabriegu, traducíu al castellano, catalán, euskera, portugués, alemán, chino, checo, ruso, italiano y búlgaro, ye'l llibru más lleíu de tola historia de la lliteratura gallega, un clásicu.

Xosé Neira Vilas (Gres, 1928) ye fíu de llabradores qu'emigró a finales de los años 40 pa l'Arxentina. Depués de 1961 fixó la residencia en Cuba, viviendo dende hai unos años en Gres, onde organizó la Fundación Cultural que lleva'l so nome. Conocíu sobre too pol llibru que publicamos, ye tamién autor d'otres noveles y llibros de cuentos magníficos, de poesía y d'ensayu.

La tierra entero

Berta Piñán

PREMIU TRABE 1995
112 páxines (Cuentos)
13 x 20 cms.
1.150 ptes.

Los dieciséis cuentos que formen La tierra entero, Premiu de Narraciones Trabe 1995, preséntense al llector comu un retratu plural de la experiencia humana, variáu tantu dende'l puntu de vista formal (relatos brevísimos que malapenes ocupen una páxina xunta cuentos yá más llargos) comu polos temes: la visión cariñosa y dura d'una sociedá rural que depicúa («Ñeva», «Paisaxe con figura», «Samartinu», «El Pindal»...), la violencia cotidiana de les relaciones humanes nuna sociedá que camina pel asfaltu («Atracu a mano armada», «El mundu ye un pañuelu»...), la convivencia difícil («Amnesia», «Relaciones prematrimoniales»...), pero too ello mirao siempre dende una perspectiva cotidiana y realista que dalguna vegada («L'airón del desiertu») se convierte en máxica.

«Paisaxe con figura» ganó primero'l concursu de cuentos Fernández Lema (1995) y sirvió más tarde (1996) comu guión pa un curtiu de televisión que tien el mesmu títulu.

Berta Piñán nació en Cañu, Cangues d'Onís, en 1963. Conocida y prestixosa poeta, xéneru nel que tien dos llibros publicaos (Al abellu les besties, 1986 y Vida privada, 1991), recueye nesti volume la obra escrita hasta'l momentu, que yá s'adelantara na antoloxía Muyeres que cuenten (Trabe, 1995).

Dharmat

Vital d'Andrés

192 páxines (Novela)
13 x 20 cms.
1.850 ptes.

¿Qué pue pasar cuandu les ideoloxíes y los valores comunmente aceutaoss'agoten y dexen de producir significáu? ¿Qué pue pasar cuandu los individuos se descubren impotentes ante fuercies y intensidaes que los desborden y los emburrien hacia nuevos territorios de perceición? ¿Cómu nomar eses fuercies? ¿Cómu conxurales pa da-yos sentíu? ¿Ye'l llinguaxe daqué más misterioso de lo que creyíamos, la clave capaz d'abrir nuevos territorios o realidaes?

Seklas y Abraxas son los dos polos antagónicos nesta coleición de relatos. Son dos personaxes mitolóxicos qu'actúen comu fuercies cósmiques nel escenariu de la conciencia humana. Los individuos nun son responsables de les aparraes fuercies que los invaden, en primer llugar porque nun esiste dengún yo dende'l cual decidir o alcontrar abellugu. El yo y los sos apegos resquebráxense ante poderes sobrehumanos y inhumanos que nun son quien a controlar.

La creación de Seklas, el demiurgu, ye un mundu de basta imitación que se repliega en centros gravitatorios de control y codificación cada vegada más obsesivos. Abraxas ye l'horizón de lluz que subyaz baxo la creación de Seklas comu una menacia que se filtra tres les regalles qu'inevitable y constantemente s'abren nel mundu del demiurgu.

Son éstos actos desesperaos que lleven a caleyones ensin salida; nel casu de Dharmat, a una sociedá paralizada pola indiferencia y l'abandonu más brutal. Pero la catástrofe anuncia territorios nuevos por esplorar, realidaes tan inesperaes comu misterioses que frayen tou sentíu común.

Dharmat ye l'escenariu d'esi conflictu que se vive tantu na dimensión social comu individual.

Vital d'Andrés nació en Sama de Llangréu en 1950 y vivió más de quince años n'USA. Trabayó en fábriques, talleres, oficines... desempeñando los más variaos oficios. Considérase protestante. Ye Graduáu en Ciencies de la Educación y Máster en Lliteratura Inglesa pola Universidá de Texas n'Austin, onde fexo la tesina sobre James Joyce. Actualmente ye profesor d'inglés nel Institutu d'E. S. de Corvera. Ye collaborador habitual de la seición «Alitar Asturies» d'El Comercio, amás de publicar artículos o relatos n'otros medios de comunicación.

Maldaes de llobos

Joaquín Fernández García

216 páxines (Cuentos)
13 x 20 cms.
1.750 ptes.

L'autor de Coses d'osos (ocho cuentos alleranos), publicáu por Trabe en 1993, centra agora la so atención narrativa al rodiu del otru gran animal selvaxe d'Asturies: el llobu.

Cola documentación etnográfica que caracteriza los sos trabayos, frutu d'un continuáu llabor de campu xunta los homes y muyeres de les tierres altes del conceyu d'Aller principalmente, Joaquín recrea maxistralmente'l mundu del llobu nel entornu nel que vive: al llau de la xente, compitiendo les más de les veces pol mesmu espaciu natural. Asina devuelve a los llectores asturianos, feches verdadera lliteratura, hestories que tuvieron un orixe munches veces popular y que se difundieron primero oralmente.

Son cuatru los apartaos nos que divide'l llibru, contando en cada ún la relación del llobu col mundu, colos nenos, colos homes y coles muyeres, faciendo al mesmu tiempu un verdaderu tratáu sobre esti animal que cuerre seriu peligru de desapaecer.

Joaquín Fernández García nació n'Uviéu en 1943. Ye Llicenciáu en Medicina pola Universidá de Granada y Doctor, con una tesis sobre medicina popular n'Asturies, pola d'Uviéu. Amás d'otros munchos trabayos sobre etnografía y folklore tien publicaos los siguientes llibros de relatos: el yá citáu Coses d'osos (ocho cuentos alleranos), (Trabe, 1993), Fito nel país de los gorretinos, (Trabe, 1994) y Les vaques tamién piensen y sienten (1996).

El tren de medianueche
y otros cuentos

Sabel de Fausta

104 páxines (Cuentos)
13 x 20 cms.
1.250 ptes.

Sabel de Fausta recueye nesti volume los cuentos que tien escritos en llingua asturiana dende primeros de los años ochenta hasta agora. La mayor parte d'ellos son retratos de la vida cotidiana, escenes tomaes de la cai y en toos ellos destaca la naturalidá y fluidez narratives xunta un llinguaxe curiáu y asturianísimu. Dalgunos d'estos cuentos recibieron el primer premiu en distintos concursos: «Boniel» el d'Autores Noveles de la Universidá Popular de Xixón en 1984, «Esperteyu» el de Llectures pa Rapazos de l'Academia de la Llingua de 1987, «Los güeyos» el de Cuentos del Ayuntamientu de Carreñu de 1987, «La güerta xixonesa» el del Ayuntamientu de Xixón de 1987. «La lancha» llevó un accésit nel Concursu de Relatos de la Mar del Ayuntamientu de Carreñu de 1984.

Poeta y narradora, Sabel de Fausta ye l'alcuñu col que firma la so obra Isabel López Labrada, nacida en Xixón en 1934. Ye Péritu pela Escuela de Comerciu de Xixón. Amás de dalgunos trabayos recoyíos n'ediciones coleutives, publicó Coples del Antroxu en 1983 y 1984 y Mercáu de vida, mercáu de muerte; Esperteyu en 1987. Ye collaboradora habitual de la seición «Alitar Asturies» d'El Comercio y en 1984 fexo pa Radio Xixón los guiones d'un espaciu que llogró popularizase: «El requexu de Balba».

L'estrañu

Albert Camus

Traducción del francés de Xosé María Fernández
112 páxs. (Novela)
13 x 20 cms.
1.450 pesetes

L'estrañu, publicada en París en 1942, ye una de les grandes noveles de la lliteratura universal, magníficu representante de la lliteratura existencialista, la corriente de pensamientu que dende Francia tanto influyó na cultura del nuesu tiempu. Con una engañosa simplicidá, la novela amuesa nes dos partes de que consta la verdadera pinta del protagonista, de Meursault: pasivu, indiferente... Na primera vemos cómu un ciudadanu normal se convierte nun asesín ensin motivu aparente, y na segunda cómu lu xulga una sociedá indiferente. Pero ye a la vez un relatu lúcidu de la carencia de valores del nuesu tiempu. El protagonista decátase al final de que la indiferencia del mundu nun ye una victoria, ye un fracasu.

Albert Camus (Mondovi, Arxelia, 1913-1960), a pesar de que se diera a conocer comu ensayista, llabor que continuaría a lo llargo de tola vida, ye más conocíu comu narrador o comu autor de teatru que comu pensador. Noveles comu la que presentamos al públicu asturianu o La peste (1947) y La chute (1956) fixeron d'elli un autor fundamental d'esti sieglu que, a midida que pasa'l tiempu, más se revaloriza. Comu autor de teatru escribió Le malentendu (1944) y Caligula (1945) ente otres obres.

Recibió en 1957 el Premiu Nobel de Lliteratura, tres años enantes de morrer nun accidente de circulación.

Escuela de melecineros

Álvaro Cunqueiro

Traducción del gallego de Xuan Bello
96 páxs. (Cuentos)
13 x 20 cms.

Escuela de melecineros forma parte de la triloxía de «retratos» populares qu'escribiera Álvaro Cunqueiro y que se topa ente lo meyor de la so producción lliteraria. Sigue al qu'editamos traducíu al asturiano en 1995, Xente d'equí y d'acullá, y va completase ensiguida col terceru y últimu, Los otros feriantes.

Dividíu en tres partes, Escuela de melecineros empieza retratando los sanadores que s'ocupaben por igual del cuerpu y de l'alma de la xente. Depués siguen les «Novedaes del mundu y fauna máxico», «delles notes del mal de güeyu, el diañu y los trasgos, el llobu y tamién del raposu y diversos animales fantásticos, onde van varios que son –diz Cunqueiro– de la mio imaxinación, lo que nun quier dicir que nun sían, y nel más estrictu sensu, reales...» El llibru piésllase cola «Fábula de varia xente», nueves histories de personaxes del país, peñeraes con un humor mui nuesu.

Na nota cola que'l mesmu Cunquiero abre'l llibru escribe: «Too xunto ye un pequeñu viaxe pente la xentina nueso, y nun duldo de que nel mio espeyu igual quedaron, sorprendíos y per un intrín, rostros de lo que llamamos ser gallegu, de la insondable profundidá del ser gallegu».

Álvaro Cunqueiro naciera en Mondoñedo, Lugo, en 1911 y morrió en Vigo en 1981. N'asturiano tamién se publicó, en 1990, la so novela Merlín y familia.

Lula, Lulina

Berta Piñán y Carmen Peña

24 páxines
17 x 19 cms.
Ilustráu a tou color
PVP: 550

«Lula ye una rapacina más chica qu'una pitina». Asina entama esti prestosu llibru interactivu pa los críos más pequeños, onde Lula va tomando contactu colos animales del entornu: les pegues, les pites, los mirueyos, el babalín, la xaronca, la coruxa, los gochos, l'esguil... Esti preciosu llibru ye'l resultáu de la colaboración ente la escritora Berta Piñán (Premiu de Narraciones Trabe 1995) y la grabadora y dibuxante Carmen Peña.

Espantamures

Xilberto Llano

Dibuxos a color de Germán García

24 páxines
17 x 19 cms.
PVP: 550

Carlos va tolos díes, en merendando, a xugar a los columpios. Güei llega tamién Carme y xuntos atopen una caxa mistos. Quieren prender una foguera pa ver si s'enfada'l Nuberu y llueve. Esti ye un llibru pensáu pa los primeros llectores, onde destaquen por igual la hestoria de Xilberto Llano comu los dibuxos d'un de los meyores ilustradores asturianos, Germán García.

Un carbayu cocoteru

Enrique Carballeira

PREMIU MONTESÍN 1994

Dibuxos a color del autor
64 páxines
12 x 19 cms.
PVP: 750

La vida tranquila de Villa Marina vese alborotada por un fechu insólitu: un carbayu qu'hai na Llomba ponse a dar cocos. El mundu enteru movilízase: la tele, curiosos, científicos... Pero va facer falta que dos rapazos del pueblu, Quique y Quecu, se apongan a investigar pa qu'escample'l misteriu.

Enrique Carballeira nació nel Infiestu en 1970. Trabaya na radio. Tien publicaos munchos llibros pa nenos, nos que ye autor del testu y de los dibuxos. Tamién fai cómics.

Esti llibru ganó en 1995 el premiu MONTESÍN de lliteratura infantil.

Morfema, mormefa, mormera...

Carme Martínez

Dibuxos de l'autora
56 páxines
12 x 19 cms.
PVP: 850

Fuen, Dani, Enol, Dela, Xuanín... son dalgunos de los protagonistes de cada ún de los capítulos que formen esta pequeña novela, que xira alredor de la escuela. Pero tamién tán equí García Lorca y la guerra o la carabela la «Pinta»...

Carme Martínez nació en Xixón en 1955. Ta Llicenciada en Lliteratura Española y ella mesma fai los dibuxos de los sos llibros.

Ganó'l Premiu «Montesín» de Lliteratura Xuvenil de 1996 col llibru Cuentos pa una nueche ensin lluz.

Montesín

María Josefa Canellada

Ilustráu a tou color por Violeta Monreal
104 páxines
12 x 19 cms.
PVP: 1.100 (tapa dura)
850 (rústica)

¿Quién nun conoz a Montesín, la cabritina perdida peles tierres qu'arrodien L'Escorial y qu'atopen y curien unos nenos? Publicáu en 1980, esti llibru foi el primeru de la lliteratura infantil que s'escribió n'asturiano. Un clásicu.

María Josefa Canellada ye una de les principales escritores asturianes d'esti sieglu. Nació nel Infiestu en 1913. Estudiosa de la llingua y de los cuentos y tradiciones d'Asturies (a los que dedicó varios llibros), publicó en 1990 el relatu Malia, Mariantia y yo.