|
Títulu: Los tres gochinos Ser folgazán o malcuriosu nun ye cosa recomendable
nin tan siquiera pa los gochos, sobremanera si anda per ende un llobu
afamiáu. |
|
LLIBROS DEL PEXE. 2001
NOVEDAES N'ASTURIANO
|
PRIMEROS LLECTORES |
|
|
LLITERATURA INFANTIL |
|
|
NARRATIVA XUVENIL |
|
|
POESÍA
Universu |
|
|
PROSA
Puzzle |
|
|
COMIC
La Crónica de Leodegundo |
|
COLECCIÓN
Cuentos pa tardes d'agua
PRIMEROS LLECTORES
Esta colección recueye, en formatu álbum, versiones de los cuentos más universales de la lliteratura infantil, adaptaos pa los más pequeños. Les precioses ilustraciones a too color de Mª Amor Fernández, dibuxante asturiana que trabaya equí un encantador estilu naïf, casen mui bien cola edá d'esos llectores.
Los cuentos de tola vida (Capiellina collorada, Ricinos d'oru, Los tres gochinos), en versiones descargaes de los elementos más terroríficos que taben presentes na fonte orixinal, y mui indicaos p'aniciar a los neños na llectura de la mano d'un narrador d'apoyu (especialmente de los pas). Llibros pa lleelos, pero tamién llibros p'agüeyalos, pa tocalos. Llibros pa que los neños disfruten d'esi mieu magnéticu y universal que ye'l mieu al llobu.
|
Títulu: Los tres gochinos Ser folgazán o malcuriosu nun ye cosa recomendable
nin tan siquiera pa los gochos, sobremanera si anda per ende un llobu
afamiáu. |
|
COLECCIÓN
¿Y qué?
DENDE
LOS 8 AÑOS
En cada llibru d'esta nueva serie d'Editores Asociaos preséntase un problema o situación de la vida real, al tiempu que se propón una desdramatización y una solución afayadiza y orixinal, cásique siempre en clave d'humor. Los ilustradores escoyéronse ente los meyores d'esti arte. Una colección ensin complexos.
|
"Cuando nací pesé cuatro kilos y trescientos gramos. Dizque m'asemeyaba a un quesu bola y que me ría muncho, sobremanera depués de mamar..." |
|
"A mio pá nun-y gusta
qu'a mi nun me guste'l futbol. Diba presta-y qu'a los sábados
de tarde marcháramos xuntos a xugar al futbol. Pero yo quiero
más entamar otru plan..." |
|
|
"Nun había manera. Enxamás diba aprender. Tola vida diba siguir diciendo Ggamón Gguegga tien la gogga ggoxa. Y la capital d'Italia sería Ggoma. Y siempre diba tener qu'andar perehí ggepagtiendo poggazos, tou ggabiáu..." |
|
Títulu: Mio padre ye
ama de casa "Los otros neños y
neñes teníen padres que yeren carpinteros, abogaos,
tasistes, padres inxenieros, padres camareros, periodistes...
Yo yera la única que tenía un pá ama de
casa..." |
|
NARRATIVA XUVENIL
Títulu: Los caminos ensin fin
Autor: Pablo Antón Marín Estrada
Premiu Abril 2000
ISBN 84-89985-47-2
160 páxs. 20 x 14 cm.
PVP: 1350 pts.
Edá: Dende los 12 años
El narrador y protagonista d'esta preciosa novela d'aniciación ye un rapaz que, clisáu pola imaxe bohemia y aventurera d'un tíu navegante, decide él tamién facese marineru. Bien llueu va descubrir tola belleza y tola dureza que la mar guarda pa los que nagüen por cruciar la inalcanzable llinia del horizonte.
COLECCIÓN
Universu
POESÍA
La poesía ye'l xéneru onde les palabres algamen la so más alta espresión. La voz d'unos pocos poetes verdaderos será, seguramente, el meyor testimoniu que van poder dexar, pa les xeneraciones futures de llectores n'asturiano, los escritores d'anguañu.
La colección Universu quier atesorar lo meyor de la poesía qu'escriben los nuestros poetes, pero tamién qu'esos mesmos poetes fagan falar asturiano a los más grandes nomes de la poesía universal.
 |
Títulu: La maleta de Simbad Poeta, traductor, articulista, narrador, diarista... nada de lo lliterario-y ye ayeno a Pablo Antón Marín Estrada. Bona preba d'ello ye esti llibru onde trai al asturiano (col tácitu permisu de Safo, Horacio, Li Po, Pessoa, Kavafis, Cunqueiro y demás compaña) dalgunos de los meyores poemes enxamás escritos. |
|
Títulu: Sieglu XX, cambalache Xuan Bello (Paniceiros, 1965), ún de los nomes fundamentales de la lliteratura n'asturiano, aportó a la nuestra poesía, xunta un fondu caudal lliterariu, la plena naturalidá nel usu del idioma. Agora avéranos tamién la so particular visión poética del sieglu pasáu, coles versiones de dalgunos de los meyores y más orixinales poetes d'esa centuria (Kipling, Pound, Ungaretti, Auden, Ferrater, Elitis, de Sena, Pavese...), xuntos en memorable cambalache. |
|
COLECCIÓN
Puzzle
PROSA
Esta ye la colección más llarga de Llibros del Pexe. Nella tán representaos los meyores escritores asturianos de los últimos venti años, ente los que tien yá un bien ganáu sitiu d'honor (anque seya de los más mozos) el llaniscu Martín López-Vega (1975), autor d'El sentimientu d'un occidental, qu'ensin dulda, habrá ser un llibru de referencia pal buen llector d'asturiano.
|
Títulu: El sentimientu
d'un occidental ¿Cuál ye'l sentimientu d'un
occidental? La pérdida, la consciencia de saber que
too pasa y cuasi siempre en devaneo. D'esi ríu de la
vida que cuerre y cuasi nada nun dexa nes orielles de l'alcordanza,
rescata nesti llibru Martín López-Vega momentos
de lluminosidá, ciudaes, llibros, músiques que
constrúin una fráxil barca cola que navegar
pelos mares del escaezu: notes d'un navegante avezáu
qu'han servir pa que los llectores que s'averen a estes páxines
alcuentren nuevos mapes y brúxules colos qu'atopar
esi camín secretu que lleven dende siempre buscando. |
|
La Crónica de Leodegundo
COMIC HESTÓRICU
Esta serie ye un proyectu creativu titánicu, que naz en 1991 del trabayu y la voluntá del so autor, Gaspar Meana, que reconstrui, con una llaboriosidá y una fidelidá plasmantes, más de mediu sieglu d'hestoria altomedieval. N'actualidá tán yá publicaos diecisiete volúmenes d'esta monumental epopeya.
Basada nuna "perdida" y homónima crónica onde'l monxu Leodegundo nos cuenta les andances de la so noble estirpe, desenrróllase al empar que naz y medra la propia monarquía asturiana. Los protagonistes, persiguíos por un verdaderu fatum, muévense y viaxen, munches veces al debalu, pela xeografía y el tiempu que-yos tocó vivir.
Títulu: La Crónica de Leodegundo
XVI. Revolución (817-818)
Autor: Gaspar Meana
ISBN 84-89985-45-6
48 páxs. 29 x 21 cm.
PVP: 1600 pts.
Continúen nesti episodiu les aventures del asturianu Piniol, que, tres el desastre de la batalla del Orón, algama del so rei'l preste pa viaxar a Córdoba a pagar el rescate polos sos fíos. La capital de los Omeyes amuésase-y al esmolecíu padre esplendente y cruel, distante y tumultuosa pero sobre too, enllena de peligros.
Tou amigu de la civilización andalusí habrá disfrutar con esta verosímil reconstrucción de la capital emiral. Una Córdoba que taba yá prósima a les esquisiteces del boatu y arte d'Abderramán II, una Córdoba qu'entamaba a beneficiase de los artistes y comerciantes que fuxíen de les convulsiones d'Asia...
Títulu: La Crónica de Leodegundo
XVII. Fíos de Troya (818-833)
Autor: Gaspar Meana
ISBN 84-89985-46-4
48 páxs. 29 x 21 cm.
PVP: 1600 pts.
Esta ye la hestoria del fíu de Teudán, Lu'Lu'i ben Teud al-Bagdadí, y de los de so. Una biografía enllena de peripecies que nos fala sobre la rama más esótica de la Saga de Leodegundo, la que llogró adueñase d'Alexandría la Grande.
Al traviés d'estes páxines, l'autor redobló la so documentación hestórica, too con tal d'ufiertar al llector la mayor verosimilitú posible nún de los episodios más rocambolescos y intensos de los fíos d'Hispania nel sieglu IX. Verdá ye qu'esa epopeya de piratería y atropellos nun ye mui exemplarizante, pero sí merez figurar en cualisquier manual d'una Hestoria de la Supervivencia. Remotu por desconocíu, escaecíu pola bibliografía peninsular, equí resurde ún de los capítulos más negros del Delta del Nilo y del Exéu.
