VEGA BLANCO, Xosé María

(1956)

Nació en Xixón nel añu 1956. Llicenciáu n’Hestoria pola Universidá d’Uviéu. Apaez vinculáu dende bien xoven a movimientos asturianistes. Ye ún de los fundadores y principales animadores de la tertulia cultural El Garrapiellu de Xixón: un diversu grupu de xente que s’axunta pa entamar actividaes de lo más estremao: escursionismu, divulgación de rutes d’interés hestóricu y cultural, defensa del patrimoniu, convocatoria de certámenes lliterarios y celebración de charres selmanales sobre un tema monográficu nel reserváu d’un café xixonés. De profesión publicista, collabora con dellos medios de comunicación como la cadena Ser de Xixón o El Comercio y dende hai tiempu ye responsable y conductor del programa n'asturiano La miriella qu’emite Televisión Local Gijón (TLG).

En 1997 estrénase como narrador cola novela Un sieglu de nós, una hestoria que, como’l so títulu indica, percuerre la trayectoria vital d’una saga familiar dende 1898 hasta 1998, pa trazar un retratu hestóricu de la mesma sociedá asturiana a lo llargo de la dómina contemporania.

Ye autor tamién de la novela La Deva (1999), narración d'aventures ambientada nel medievu astur na que rescamplen los conocimientos hestóricos que d'esa dómina tien Xosé María Vega Blanco.

BIBLIOGRAFÍA

Creación

Vega Blanco, Xosé María

Un sieglu de nós / Xosé María Vega. — Xixón : vtp, 1997. — 109 p. ; 17 cm. — (Domus ; 8).

ISBN 84-89880-01-8

Vega Blanco, Xose María

La Deva / Xosé María Vega Blanco. — Xixón : Llibros del Pexe, 1999. — 159 p. ; 18 cm. — (Puzzle ; 26)

ISBN 84-89985-28-6

ANTOLOXÍA

Santa Euxenia los Pandos. Añu de 1898.

Mino hubiérese llevantao más tarde de lo que yera’l vezu n’aldega pesie a que’l díi enantes fuere la fiesta grande de les pocu más de trenta caseríes que, colos sos horros, cortes y tenaes, formaben el pequeñu y casi milenariu poblamientu de Santa Euxenia los Pandos. La tiesta de Mino taba neto qu’una xaula de grillos. Percorrió medio desnudu y zapicando’l cachu que separtaba la so cama de la corte apegada a la casa, y ellí, afaláu’l cabezu por un apavoriante clavu y esgañáu’l bandullu por una man invisible, arroxó, nel suelu engafáu de cuchu y pación, un líquidu abuxaracáu que nun yera sinón qu’un formientu fecho de sidra y oruxu. Dempués d’un bon cachu, colos güeyos llarimosos y esbabeyando, tornó de nueu pa la casa. Cuando ya taba nel quiciu l’astragal sintió la runfona voz de Pedru, el vecín y collaciu del padre:

—¡Si anueche bebisti y fízote dañu, écha–y un remonte del mesmu pañu! ¡Ja, ja, ja...!

Entró na casa. La madre taba a la vera’l llar atendiendo por una perolona que colingaba de les calamiyeres. Tresnaba un pote de pataques, berces, fabes y un poco gochu.

—Mino, esto nun puede siguir asina. Y nun digas qu’ayeri foi la fiesta la patrona, porque tu tienes trescientes sesentaicincu patrones al añu.

—¡Cago’n señor nin! ¡Otra vez con eses, madre!

—¡Sí! Otra vez y milenta veces más si fai falta. Y más agora que to pá ya nun ta, y tu teníes que ser un paisanu. Tenemos la casería fecha una llaceria y el ganáu mál atendío, y tu, como si fueres ricu, a tirar les perres que nun tienes bebiendo y convidando ensin sen. Nun sé qué va ser de ti, fíu, nun tienes chapeta nin quien te la ponga.

—¡Ya ta bien, madre! Sabes que too va cambiar, que cortexo a esa mocina de La Riera y que l’asuntu va pa casoriu. En cuantes me case, íguase todo.

—¿Iguaráse? ¡Iguarióle! ¿Cres que s’igua todo casándote con esa moza rica que tien media parroquia nel llanu La Riera, arnás del molín y qué sé yo cuántu más? ¡Probe d’ella como te quiera! ¡Has bebé ylo todo!

La Piera de Colunga. Añu de 1899.

La casona d’aldega, de tres cuerpos, fecha de piedra, enllucida y pintada de blancu, dexaba ver al traviés d’una de les dos ventanes del corredor central la lluz mariello azulaa d’una lámpara de carburu. Fuera la nueche yera d’inclemente inviernu. Les caleyes de la pequeña aldega de La Riera yeren regatos, el pueblín enteru una llamorgal. Diba pa un mes que llovía y xarazaba ensin parar. Na casa morría un home amayucáu pol trabayu na tierra.

—Padre, nun muerras...

—Fía... Llegóme la hora... Ya lo trabayé too, y too va ser pa ti. Marcho pa con to madre... Agora tu, fiyina, tienes que lluchar y trabayar por caltener tolo que to madre y yo llevantamos con tantu sudu... Cásate con un home trabayador y prudente... ¡Ai, fiyina! —quexóse, trémulu, el paisanu.

—Padre, sí. Voi casame con Mino, y los nuestros fíos van siguir curiando polo que ficistis. Pero nun muerras entá, padre.

—¡Minín, Minín...! ¡Ai, fiyina...! Minín ye mui gayasperu... Nun sé si una tiesta llena páxaros valdrá pa esta casa... Talántalo bien, fiyina... —dixo’l vieyu, y entamó a tusir con tusíu cavernosu producíu polos cáncanos que–y comíen los polmones.

—¡Padre!

—Venga, Taresina, nun faigas falar a to pá, que ta mui mal. Vete a achucate un poco, que te fai falta—dixo’l médicu del conceyu, qu’atendía al paisanu nes hores caberes.

Pocos díes dempués, con serenidá y señoríu campesín y repitiendo los conseyos repetíos al traviés de xeneraciones campesines, morrió Xuan Migoyo. Al entierru asistió Belarmo, Mino’l de los Pandos.

(De Un sieglu de nós)