PRIETO,
Felipe
(1941)
Nació en Zamora nel añu 1941 pero vive
n’Asturies dende los tres años. Fue profesor d’enseñanza primaria pela zona
centroriental asturiana y n’Uviéu. Depués de vivir una temporada n’Escocia,
vien trabayando como artesanu y diseñador d’obxetos de cueru.
Ye autor Felipe Prieto d’un únicu, pero importante llibru de poemes
(anque nun perpasare les venti páxines): Esbilla,
publicáu en 1980 pol Seminariu de Llingua Asturiana que dirixía García Arias.
El llibru Esbilla valorábalu
asina en 1991 el críticu Xuan Xosé Sánchez Vicente: “venía a confirmar (...)
que estábamos en presencia de un poeta de excepcional fuerza expresiva y de un
especial significado dentro del Surdimientu. En efecto, si por la temática,
fundamentalmente social, Felipe Prieto se insertaba plenamente en las
corrientes dominantes en aquellas fechas, el hecho de volver sus ojos al
campesinado y al campo ‘viendo’ en ellos lo que la literatura tradicional nunca
había visto (la brutalidad de la emigración, la soledad, la vejez de la
población, su miseria...) hacen de su poesía algo radicalmente novedoso”. El
mesmu críticu señala que non sólo pol arriesgáu tratamientu del tema de la vida
rural ye interesante esti llibru: “el tema no hace de Prieto un gran escritor y
mucho menos un gran sociólogo. Son lo directo de su escritura; la novedad de
sus metáforas; el tono desabrido y al mismo tiempo de honda solidaridad; su
peculiar ritmo, a la vez moroso y simple, los que causan este efecto”.
En 1981 Felipe Prieto fue ún de los miembros correspondientes de la
primera nómina de l’Academia de la Llingua. D’entós p’acá nun-y conocemos
producción lliteraria.
BIBLIOGRAFÍA
Creación
Prieto, Felipe
Esbilla : (poesía) / Felipe Prieto. —
Uviéu : Seminariu de Llingua Asturiana, 1980. — 20 p. ; 22 cm.
ISBN 84–7468–036–0
Bibliografía
Carmen Díaz Castañón, “Prieto, Felipe”.
En: Lengua y literatura, Gijón,
Júcar, 1981, p. 283.
Álvaro Ruiz de la Peña, Introducción a la literatura asturiana,
Oviedo, Biblioteca Popular Asturiana, 1981, p.278.
Xuan Xosé Sánchez Vicente, Crónica del Surdimientu (1975-1990).
Uviéu, Barnabooth, 1991, pp. 65–66.
ANTOLOXÍA
DÍgovos yo por ú tien d’ir la estaya,
si fai falta semar palabres atrevíes.
Atalanto ú fai falta un pocu más d’home
ú tenéis que llancar la ternura y les
ansies.
U tenéis que regar con sangre o con
sudor.
Demándovos a toos el brazu y la
impacencia,
pídovos la paz pa cuchar el tiempu.
—Guardái el llantu en horru pa regar la
muerte:
yo doivos sólo esperanza, alegría nel
granu
¡Que naide mi muela la voz nel molín
nin faga pan más blancu col mio son de
semenciu!
Non fagáis de tou esto nin roses nin
claveles:
yo déxovos mio voz pa semala fonda:
vuestros son la llabiega, el terrenu y la
vida.
CamentÁi,
cuando vos pasen los años per encima
comu un trator del tiempu.
Camentái, vos digo,
los neños y la herba.
Camentái los xareos l’arrosá y les rises;
l’orbayu embaxu’l parque de bedules
y el boriar saláu del abeyón ente la
rama.
Comparái, entós, cuando vos griña’l pasu,
les ñubes cones ruines, el suelu
col cielu, los muertos colos vivos.
Comparái, entós, los años colos díis
la espuma col posu, el pan coles
palabres,
les piedres col aire, el sollozu y la
risa.
Y caerés dexaos, desde vosotros mesmos,
amanciaos pola vida, frutos d’esperanza,
ente lo verde, el prau, la tierra escura
y otra vez esbillaos, a puxar pola vida.
(Esbilla)