OCHOA, Santi F.

(1969)

Nació Santi Fernández Ochoa en Mieres del Camín nel añu 1969. Llicenciáu en Ciencies Polítiques pola Universidá Complutense de Madrid. Trabayó como redactor en dellos periódicos llocales d’Asturies; anguaño desarrolla’l so llabor profesional como creativu nuna axencia de Publicidá d’Uviéu. Fue candidatu del Partíu Asturianista a l’alcaldía de Mieres nes elecciones municipales de 1995.

Ye autor d’un solu llibru, la novela Los párpagos de Buda, Premiu Trabe de Narraciones en 1993. Ta antologáu na Muestra de nuevos narradores (1996), entamada por Ramón Lluis Bande pa la IV Xunta d’escritores asturianos.

Santi Ochoa sorprendió al panorama lliterariu asturianu cola so primer novela Los párpagos de Buda, un relatu cruel y descarnáu, con abondos tintes autobiográficos, de l’aventura iniciada por un xoven de les cuenques mineres col mundu de les drogues sicotrópiques. La novela, de fechura heteroxenea y una peculiar estructura narrativa, sirve al autor p’axustar cuentes con dellos de los mitos ideolóxicos de les últimes décades colos que crecieron les nueves xeneraciones.

BIBLIOGRAFÍA

Creación

Fernández Ochoa, Santi

Los párpagos de Buda /Santi Fernández Ochoa. — Uviéu : Trabe, 1994. — 99 p. ; 20 cm. — (Incla Interior ; 13).

ISBN 84–8053–033–2

ANTOLOXÍA

I

Nací y miedré nun pueblín de la cuenca minera que, bien ye verdá, nunca me prestó demasiadamente. De nenu supongo que fui comu tolos nenos de la mio y d’otres xeneraciones. D’adolescente supongo que comu tolos adolescentes de la mio edá y quiciás, d’eso nun toi tan seguru, d’otres xeneraciones; con poques ganes de trabayar, munches d’analayar y un ratu pergrande metíu na testera. Llueu, al tiempu que me fui faciendo mayorín, fui añoriciando toles coses que yo creyía vulgares y corrientes. La xente y el pueblu que m’arrodiaba, el modu de ser d’esi pueblu y esa xente, la forma falar. En siendo comu yera un mal estudiante fici tolo posible por salir d’aquel furacu nel que me creyía metíu, y busqué abellugu nos llibros y nel estudiu. De la nueche a la mañana pasé de ser un randa a ser lo que yo creyía un nenu “desemeyáu” del restu los mortales. Eso nun m’impidía tener un reducíu grupu de collacios asemeyaos n’ideyes y frustraciones, n’odios y ambiciones colos que m’enfilaba bastante yá dende los 14 ó 15 años. Yéramos un grupu tamién desemeyáu del restu, o eso creyíamos. Prestábanos enfilanos y reyinos de la xente, del restu, de los mortales, de los que nun xufríen. Sólo nós teníemos el drechu y privilexu de xufrir. Curiosa vida, diéronnoslo too fecho y sólo xufríamos de mente. Pa nós, los que xufríen de fame nin siquiera cuntaben. L’adolescencia ye una edá d’impertinentes onde crees que lo sabes too, pero en verdá lo único que faes ye matate a payes pensando nun sexu idílicu.

Yo creyo qu’esi ye’l gran problema de los adolescentes, esi coñu mal cuntáu, mal descritu que ten emos dientro. Y digo mal cuntáu porque llueu, cuandu por fin sabes cómu son los coños, empieces a baxate d’unes burres nes qu’anantes creyíes. Eso fue lo qu’a min m’asocedió. El día que con 17 años baxé a ca la vecina y la nena m’echó cincu polvos, empencipié a pensar d’otra man era.

Llueu acostuméme al tastu y calor d’esi muérganu que, anque non tan idílicu comu yo imaxinaba, sí yera mui golosu y aprovechaba toles oportunidaes de tastiar ún ensin el menor reparu. Asina siendo más o menos un dandi que diba de Rourke pela vida vi cómu’l mio suañu se cumplía y marchaba pa la gran capital a estudiar periodismu. Fuxía d’aquella parva cuchu que yo consideraba a la mio tierra y adientrábame nun cosmopolitismu de cartón piedra, d’Ajoblanco y País Semanal. Fuxía del país que me dio una identidá qu’odiaba, y entraba nel zocu más impersonal y con menos identidá que l’home pariera.

De xuru qu’a les poques selmanes de tar en Madrid yá me diera yo cuenta d’esto. Y ye que nun hai nada meyor pa nós que salir a vivir una buena temporada pa otru llau, pa danos cuenta de qué ye lo que de verdá tenemos, y qué ye de verdá lo que tanto aseñardábamos. La pena ye que non tol mundu tien la oportunidá de dir vivir fuera unos años. Sicasí conozo xente que llevaba dellos años más que yo fuera d’Asturies y alcontrábase divinamente, pero qué‑y vamos facer, nesti mundu tien qu’haber de too.

Tuvi cuatru años viviendo en Madrid y a les cuatru selmanes yá vi qu’aquello nun yera lo mío. Igual qu’aquellos coños que la mio cayonca mente imaxinara nel mundu de les payes se baltaron enteros cuandu la mio vecina me llantó aquel esmenu, el mundu cosmopolita que yo imaxinara baltóse un cuantu tuvi que tastialu. Aparte de les desilusiones, de los cuatru años en Madrid saqué munches conclusiones que nun sé si en realidá me sirvieron pa feches posteriores, pero nun ta mal teneles en cuenta. Una de les que más tengo en cuenta ye que nunca has a llorar por una muyer o que, si lo faes, llóralo too d’una vez p’asina nun vover facelo na vida. Tando en Madrid conocí l’amor y el desamor, y sé lo que ye alloriar y perder la tiesta, sé lo que ye ser un cagayón, y sé que nun hai cosa menos prestosa y menos provechosa que desperdiciar el tiempu con eses hestories. Les otres coses qu’aprendí son menos importantes pero tamién puen ser práctiques. Nunca t’apuntes a una escuela de teatru. Nun fagas casu de lo que dicen los profesores. Nun vayas a clas, el tiempu que pierdes nella ye meyor emplegalu estudiando en casa o na biblioteca. Usa siempre, siempre, siempre condones o vas llamentalo. Por munches razones, munchísimes, usa condones.

Hai otres munches coses qu’aprendí pero o nun m’alcuerdo o quiciás nun tengan la importancia suficiente pa poneles equí. Agora remembro qu’un día, diendo pa casa depués de salir de la facultá, vi una pintada que dicía:

“La vida ye llarga y dura: tócatela”.

Aquella nueche fui pa casa, bebí tres cerveces a la salú del filósofu, fíceme una gaviola mientres escuchaba “Revolution” de The Cult, tiré tres peos y pesllé la lluz.

(... / ...)

(Los párpagos de Buda)