GARCÍA DÓRIGA, Alfredo

(mediaos del XIX-1870)

D’esti autor diznos García Rendueles que nació, allá pelos años cuarenta o cincuenta del sieglu XIX, en Viveiro (Lugo), la mesma ciudá de la que diba ser más p’alantre’l cronista oficial, y que morrió en 1870.

D’una familia noble d’Asturies pola parte la madre, escribió en castellano, en gallego (llegó a ser sociu correspondiente de l’Academia Gallega) y nel asturiano de Llena. Nesti casu trátase de composiciones onde se calumba una finalidá didáctica, al desaxerase les peculiaridaes del dialectu llenense.

A Alfredo García Dóriga incluyólu en 1925 García Rendueles na so antoloxía Los nuevos bablistas como representativu del “asturiano de Llena”.

BIBLIOGRAFÍA

Bibliografía

Enrique García–Rendueles, “D. Alfredo García Dóriga”, en: Los nuevos bablistas, Gijón, Imp. de La Reconquista, 1925, pp. 301–303.

ANTOLOXÍA

EL GUETU DE RETRUYÉS

Un mocecu en Retruyés

Con un pelu mató un guetu

Que chambía nun zapicu

Cheno de chichí moi güenu.

Un pirru chadró á la chuna

Pa contar isti sucesu,

Regolvuse el chugarín;

Prendieron al rapacecu,

Y Uxo, Casares y Ubriendes

Formanon Ayuntamiento;

El cura de Carabanzu

Fixo un sermón comu un templu

Y un abogao de la Pola

Imprentó del casu versus,

(Dióse a los imprentaores

Miel, mantega y mediu xetu.)

Foi a Llena la custión,

Y entamóse allí un gran pleitu,

Qu’en l’Audencia sentencianon

Los alguacilles más vieyus,

Que dixenon: “Nunca peguen

Los niños a ningún guetu,

Y el chugar de Retruyés

Non tenga pirrus ni pelus;

Pelus pa gatos chambiones,

Pirrus pa non ser cuenterus

Y pague les costes Uxo,

Y les monteres... ¡silenciu!...”

.............................

De entóncenes Retruyés

Non tien zapicus nin guetu,

Y los mocecus non usen

En el llugar ningún pelu,

Ello así foi!... La xosticia

Sabe n’apierta’l zapetu,

Y... bastante bien falanon

Los alguaciles más vieyus!

Conque... morró la custión...

Y les monteres... ¡silenciu!!...

(En Los nuevos bablistas)