FERNÁNDEZ, Xandru

(1970)

Nació en Turón en 1970. Llicenciáu en Filosofía pola Universidá d’Uviéu y profesor d’institutu n’exerciciu. Fue promotor de diverses iniciatives culturales y miembru del conseyu editorial de la revista d’ensayu Tiempu de Nós.

Xandru Fernández ye ún de los autores más prolíficos de la segunda xeneración del Surdimientu. Como poeta ye autor de tres llibros: Primer bestiariu (1990), Breviariu de la diáspora (1993) y Lletra muerto (1998). Nellos l’escritor turonés ensaya una suerte de poesía complexa, difícil, de corte irracionalista y surrealista con ambiciones metafísiques.

Como narrador publicó tres noveles: El silenciu en fuga (1990), Tráficu de cuerpos (1990) y El club de los inocentes (1994); por esta última obra, recibió’l Premiu Xosefa Xovellanos en 1993. Ye autor tamién d’un llibru de relatos: Del llaberintu al trenta (1995). Nel añu 1999 ganó’l premiu de novela Xosefa de Xovellanos.

Dende la so primer novela, Xandru Fernández amuésase como un narrador sólidu y esforzáu, con un procuru detallista pol llinguaxe y la estructura de los sos relatos, ya sean éstos llargos o curtios. La novela negra, el cine, el jazz, la ficción futurista, son les principales fontes onde bebe la obra del escritor turonés.

Ye autor amás de les siguientes traducciones: Land Rover de Suso de Toro, Memories d’un nenu llabriegu de Xosé Neira Vilas y de Cuentos fantásticos de José Viale Moutinho, esta última en collaboración con Adolfo Camilo Díaz.

BIBLIOGRAFÍA

Creación

Fernández, Xandru

Primer bestiariu / Xandru Fernández. — Mieres : Ayuntamientu, Casa de Cultura “Teodoro Cuesta”, 1990. — 42 p. ; 22 cm. — (Teodoro Cuesta ; 3)

DL AS 423-1990

Fernández, Xandru

Tráficu de cuerpos / Xandru Fernández. — Avilés : Azucel, 1990. — 123 p. ; 20 cm. — (Xardón ; 3).

ISBN 84-86546-23-0

Fernández, Xandru

Breviariu de la diáspora / Xandru Fernández. — Uviéu : Trabe, 1993. — 55 p. ; 21 cm. — (La fonte de fascura ; 6).

ISBN 84-8053-011-1

Fernández, Xandru

El club de los inocentes / Xandru Fernández. — Uviéu : Conseyería d’Educación, 1994. — 215 p. : il. ; 22 cm. — 14 Premiu Xosefa de Xovellanos.

ISBN 84-7847-295-9

Fernández, Xandru

Del llaberintu al trenta / Xandru Fernández. — Uviéu : Trabe, 1995. — 120 p. ; 20 cm. — (Incla interior ; 18).

ISBN 84-8053-049-9

Fernández, Xandru

Lletra muerto / Xandru Fernández. — Uviéu : Trabe, 1998. — 47 p. : 1 retr. ; 21 cm. — (Albera ; 3)

ISBN 84-8053-103-7

Traducción

Moutinho, José Viale

Cuentos fantásticos: (antoloxía) / José Viale Moutinho ; torna d’ Adolfo Camilo Díaz y Xandru Fernández. — Uviéu : Academia de la Llingua Asturiana, 1992. — 110 p. ; 20 cm. — (Llibrería académica ; 21).

ISBN 84-86936-68-3

Toro, Suso de

Land Rover / Suso de Toro ; traducción de Xandru Fernández. — Mieres, : Editora del Norte, 1993. — 149 p. ; 21 cm.— (Contemporáneos de narrativa ; 3).

ISBN 84-88660-02-2

ANTOLOXÍA

Cosadiella

Esti ye un xuegu que se llama

el xuegu de vistise colos trapos del naufraxu

el xuegu de ser too menos héroe domésticu

el xuegu d’abrir una tres d’otra obscenes lates de cerveza

y ver cómu rueden pela alfombra les pastilles

y cómu la vida rueda peles cais ehí fuera

xugando a mordese’l ráu comu nun baille nocturnu

esti ye un xuegu que se xuega ensin riise

ye bien serio: hai qu’abrir les puertes del terrariu

y dexar que les serpientes s’arrollen na piel d’unu

como si unu nun fuere otra cosa qu’una estatua

(pero admítense variantes: por exemplu la del llátigu)

en definitiva sábese

mui pocu sobre cómu entama’l xuegu:

adúcense solemnes desplicatives científiques

que pocu o nada esclarien (en tou casu

lo terrible y por tanto lo importante

ye que naide nun contó cómu acababa)

otra cosa: suel xugase

cola fría coartada del despreciu

d’otru mou cafiaríente los gritos

de quienes tamién xugaron y entá siguen faciéndolo

anque abenayá perdieren la conciencia del xuegu.

(En La patria de la piel)