DELESTAL, José León

(1921–1989)

Nació en Ciañu, Llangréu, nel añu 1921. Interésase de bien mozu pola cultura y la llingua asturianes. En 1939 estrena nel Teatru Victoria de Sama'l so monólogu Pachín y el cine sonoru, interpretáu pol actor llangreanu Arsenio Díaz. La collaboración ente Delestal y el monologuista va siguir a lo llargo de munchos años, escribiendo’l primeru abondos monólogos pa qu’Arsenio Díaz los interpretare. León Delestal trabaya tamién dende xoven como periodista radiofónicu na emisora en Llangréu Radio Juventud de Asturias: La Voz de las Cuencas Mineras, asina como na prensa escrita. Nel periodismu y sobremanera nel mundu de la radio va volcar tola so actividá profesional, ganando en dos ocasiones el Premiu Nacional de Radio y dellos Premios Ondas. Dientro del mediu radiofónicu algama nos años ochenta’l cargu de Xefe de Programación de la emisora estatal Radio 5.

Como escritor n’asturiano, León Delestal, cultivó’l monólogu, el teatru, la poesía y la prosa. Ye autor tamién de lletres de cantares tan populares como "La mina y el mar" o "Adiós xana".

A finales de los años sesenta funda xunta Llorienzu Novo Mier l’asociación Amigos del Bable, de gran importancia pa los acontecimientos que na década siguiente se diben producir respective a la revitalización del asturiano (vid. Novo Mier). Bona parte del material discográficu editáu pola asociación ye obra de Delestal: monólogos interpretaos por Arsenio Díaz, cantares, etc.

Participa na I y II Asamblees del Bable xunta al so amigu Novo Mier y cuando en 1981 se pon en

marcha l’Academia de la Llingua Asturiana, ye ún de los escritores llamaos pa formar parte de la nueva institución. Delestal, siacasu y a diferencia de Novo Mier, repara pal procesu de revitalización de la llingua con escepticismu y distanciamientu.

Ye autor d’una amplia obra dispersa en llingua asturiana y inda ensin recoyer en volume impresu. En 1974 l’Ayuntamientu de Llangréu encamentó–y la edición d’una antoloxía de los versos del tamién poeta llangreanu Antón el Chiova.

En castellano cultivó la novela, la poesía y l’ensayu, algamando diversos gallardones pola so obra.

Morrió en Madrid en 1989.

BIBLIOGRAFÍA

Creación

Delestal, José León

Alma de guitarra y doce canciones de amor / José León Delestal. — Madrid : [l’autor], 1983. —13 f. ; 30 cm.

DL M 41064-1983

Delestal, José León

Tres veces Eleazar: la Pasión según los muchachos de Jerusalén / José León Delestal. — Madrid : SM, 1984. — 301 p. ; 21 cm. — (Gran angular. Juvenil ;41).

ISBN 84-348-1341-6

Delestal, José León

Vencerás en Olimpia / José León Delestal. — Esplugues de Llobregat, Barcelona : Plaza & Janés, 1987. — 250 p. ; 22 cm.

ISBN 84-01-37275-5

Delestal, José León

Suso y la música / José León Desletal. — Oviedo : Caja de Ahorros de Asturias, 1990. — 195 p. ; 20 cm. — (Los contemporáneos asturianos ; 14).

ISBN 84-7925-001-1

Bibliografía

Antón García, “Xosé León Delestal”. En: Lliteratura asturiana nel tiempu, Uviéu, Conseyería

d’Educación, 1994, pp. 151–152.