ÁLVAREZ PEÑA, Alberto

(1966)

Nació en Xixón en 1966. Dibuxante, ilustrador y autor d’obres de divulgación de la mitoloxía y la lliteratura oral asturianes. Cofundador de la revista de comic El Llapiceru y ún de los entamadores del Salón del Comic de Xixón. Como autor fexo los testos y les ilustraciones de Asturias mágica, un compendiu de mitoloxía asturiana enriquecíu con abondos relatos recoyíos de la tradición oral. En 1996 publicó Lliendes de Piloña, una recollecha de narraciones orales del conceyu piloñés. Illustró ente otros los siguientes llibros: El libro de la gaita de Manolo Quirós, Fontenebrosa de Vicente García Oliva, Camientos, coses, curuxes d’Helena Trejo y Ello yera una vez... de Fernando de la Puente. Ye autor del fascículu: Mitología asturiana de la obra Cultura y tradiciones de Asturias del diariu xixonés El Comercio.Como ilustrador y dibuxante participó en numberoses esposiciones colectives; en 1993 espunxo la so obra gráfica na Sala Xarabal de Xixón baxo’l títulu: Mitoloxíes.

Álvarez Peña ye autor amás d’abondos carteles, diseños y carátules de discos.

BIBLIOGRAFÍA

Ensayu

Álvarez Peña, Alberto

Lliendes tradicionales del conceyu Piloña /Alberto Álvarez Peña. — [s.l.] : AYDA, 1996. — 114 : il. ; 21 cm. — (Carenda)

ISBN 84-921686-1-7

ANTOLOXÍA

EL Cuélebre

Nun tien siempre’l xeitu d’una culiebra con ales d’esperteyu. En delles lliendes tien clines, oreyes, cabeza carneru o más d’una tiesta. En munches hestories tán curiando ayalgues d’oru o xanes y princeses encantaes. Asina, nel pozu Llagu nel altu Brañavalera (Llena) hai un cuélebre de siete cabeces que ta curiando por ochu xanes dientru d’un pozu. Na más pue esaniciar l’encantu una moza que se llame Sol, colos güeyos negros y el pelu roxu, que cumpla 22 años el día San Xuan y que coincida coles fiestes de San Xuan y el Corpus y l’alborecer tea ñeváu.

N’otres lliendes ye la propia xana o la encantada la que se tresforma en Cuélebre y pa desencantala hai que da y tres besos na boca. E1 Cuélebre ye’l Culiebru, el Cúlebre, el machu la sierpe, lo que n’Euzkadi llamen Sugaar y ye’l consorte de Mari, la principal divinidá de los vascos y qu’aseméyase a dalgunes les nueses xanes. Cuando Mari y Sugaar se xunten prodúcense tempestaes. N’Asturies les xanes y los Cuélebres suelen tar rellacionaos con cueves y fontes. Ye na mitoloxía celta onde la culiebra apaez tamién curiando fontes, y yera l’emblema de la Diosa Madre Brigit (col cristianismu Sta. Bríxida) símbolu de la fertilidá (“Mitos, folklore y supersticiones” en Guía de las serpientesde Europa, 1992, de Silvio Bruno y Stefano Maugeri).

El Cuélebre ye’l guardián d’ayalgues d’oru, lo que fizo qu’Aurelio del Llano buscase pa él un orixe grecorromanu sofitándóse nel mitu del dragón que curiaba’l manzanu d’oru del xardín de les Hespérides, y al qu’Hércules mató. Tamién yera un dragón el que guardaba’l vellocinu d’oru que queríen rapiñar Jasón y los Argonautas. Pero buscar sofitu en lliendes griegues pa buscar l’orixe del Cuélebre ye abondu probe, porque la Culiebra o el Dragón van munchu más lloñe que los mitos clásicos, tenémoslu nos petroglíficos neolíticos y n’abondes cul tures quevan dende la India a la xelada Escandinavia, y munches son les relixones primitives onde la Diosa Madre la Tierra toma comu maríu a un Culiebru (Manuela Dunn Mascetti, Diosas, la canción de Eva, 1990) . Ye precisamente’l cristianismu’l que fai del Cuélebre un dragón gafu que papa princeses, ganaos, monxos o calabres. En lliendes muy cristianizaes (por exemplu en Gozón) cuenten que’l Cuélebre ye la culiebra antigua qu’enantes del Pecáu Orixinal esnalaba y falaba munches llingües, y ye nel conceyu Villaviciosa (Maliayu) na ilesia de San Emeteriu (1555) en Sietes, onde’l Diablu paez talláu na piedra col xeitu’l Cuélebre de les lliendes asturianes. Nel ábside esterior de la ilesia de Sta. María de Zalón (Allande, sieglu XI) apaez talláu na piedra un caballeru clavando una llanza al Cuélebre . Nes llendes más cristianizaes dízse que ye “San Jorge” y tamién qu’invocando a esti santu, les culiebres afuxen.

Cuéntase tamién que’l Cuélebre ye una culiebra mui grande que cuandu llega a vieya cría esnales d’esperteyu y marcha esnalando pa la mar a curiar l’oru qu’ellí ta tapecíu.

Na llienda la piedra la Culiebra, siete culiebres faen un ñudu, y ente la galmiada que suelten faen una piedra máxica que val pa curar les picadures de culiebra. Esa piedra deposítase na cabeza de la mayor de toes: el Culiebru (na realidá, parte ye un fechu biolóxicu, la cópula de la culiebra d’agua (Natrix natrix) y lo que la xente toma pol Culiebru ye la fema (demayortamañuquelos machos).

Asina, en Moniello (Gozón) Margot Costales, de 55 años, del barriu La Mazorra contaba comu de les siete culiebres enroscaes que taben faciendo la piedra, una d’elles yera’l Culiebru y tenía oreyes.

Gausón Fernández Gutiérrez recueye en Carcasón (Turón) la hestoria d’unos paisanos que taben llevantando herba nel prau la Cerecina y atoparen seis culiebres y un culiebru, esti col espinazu gordu comu’l brazu d’un picaor de la mina, la cabeza comu la d ‘un perru piqueñu y unes aluques piquiñuques, na tiesta tenía una piedra preciosa, que podía dar la felicidá a quien l’algamara, pero había que quita yla en vida (el propiu Braulio Vigón falaba tamién d’una piedra asemeyada y decía que criábase n a tiesta de los Cuélebres).

La mesma hestoria, la piedra máxica, cuéntase na Gascuña francesa col Vouivre (una culiebra con esnales que vive nes fontes) y nel Ordovés (Altu Aragón) y Couserans (Ariege) onde llamen a tal piedra Peyra da Serp.

La mesma hestoria contábala Plinio’l Vieyu (Historia natural, XXIX, 52) de los galos. Pol branu les culiebres facíen un ñudu y de la babaya y la galmiada que faen sal un güevu máxicu qu’hai que pañar, enantes de que toque’l suelu, con una saya, dempués montar a caballu y colar d’ellí poniendo un regatu d’agua pol mediu, porque les culiebres van escorrer al lladrón (l’agua ye la ponte que xune’l mundiu rial y l’Otru Mundiu Máxicu de los Celtes).

En delles tumbes de guerreros galos en Saint–Amand–sur Sèvre (Deux Sèvres) atopáronse fósiles d’oricios de mar comu oxetu de gran valir y qu’aseméyanse en parte a lo que dempués diz Plinio de los güevos de les sierpes, anque pa Jean Markale (Druidas, 1989) tal güevu ye una tema mítica, el güevu del Mundiu, y n’abondes relixones el Mundiu ye criau por delles culiebres que faen un güevu al enroscase, el güevu partese en dos y de la metá d’enriba sal la cúpula celeste y de la d’abaxu la Tierra (Marija Gimbutas Dioses y diosas de la Vieja Europa 7000–3500 a.C. Mitos, leyendas e imaginería, 1991).

N’Asturies la mayor parte de les “piedres de Culiebru” qu’hai nes cases d’aldega son trozinos de corna de ciervu quemada, fósiles d’oriciu o delles piedres azules o averdosaes que pola so forma llamen l’atención,y anque tala llienda ta abondo estendía por dellos continentes, nel casu d’Asturies faise afayaízo camentar un orixe celtiegu a esti mitu, anque ná más que seya pol mesmu ámbetu cultural.

(... / ...)

(Lliendes tradicionales del Conceyu Piloña)