ÁLVAREZ
GONZÁLEZ, Francisco
(1970)
Francisco Ramón Álvarez González nació en
Xixón nel añu 1970; en Madrid cursó estudios de periodismu. Ye redactor del
diariu El Comercio dende’l añu 1990,
onde desarrolla un llabor d’apoyu perimportante pa los movimientos sociales de
Xixón, y especialmente pal de la llingua asturiana. Dende El Comercio, esti periodista comprométese dafechu cola promoción de
la llingua y cultura del país, escribiendo les informaciones n'asturiano. Ye ún
de los miembros fundadores de la Plataforma Periodistes pol Asturiano, un
colectivu de casi un centenar de profesionales de los medios de comunicación,
qu’echa andar a mediaos del añu 1997. El so compromisu políticu y social pa
colos desfavorecíos, col mediu ambiente, pola solidaridá y con tantes otres
xeres plantegaes a nivel de cooperación internacional, llévalu a incorporase a
organizaciones sociales de lo más variopinto: Asociación para la Cooperación
con el Sur “Las Segovias”, Amigos del Sahara, Aedenat-Asturies, Xunta pola
Defensa de la Llingua Asturiana, Coordinadora Asturiana pola Insumisión, ente
otres munches. Como periodista visitó y exerció’l so oficiu n’ Irlanda del
Norte, Palestina, Líbanu, Colombia, El Salvador, Guatemala, México, Cuba,
Arxelia, El Sahara, etc.
Tien publicaos dellos cuentos en Sietestrellu,
un informe sobre’l racismu y el fascismu n'Asturies en collaboración con Quique
Faes, un conxuntu inéditu d’artículos d’opinión qu’unvió a modu de
collaboración radiofónica a Radio Kras mientres cumplía una condena de catorce
meses na prisión de Villabona por negase a realizar el serviciu militar. Amás,
ye columnista del selmanariu Les Noticies
y tien espublizaos dellos artículos más en diverses revistes: Krasnia, el diariu de la Selmana Negra A Quemarropa, del que fue redactor, etc.
En 1998 recoyó la mayor parte de los trabayos citaos en dos llibros: Patiu de prisión (retayos memorísticos
de la esperiencia carcelaria del autor na cárcel de Villabona a resultes del so
calter de insumisu) y En poques pallabres
(conxuntu de narraciones curties que retraten críticamente dalgunos
aspectos de la sociedá d'anguañu).
BIBLIOGRAFÍA
Creación
Álvarez González, Francisco
Patiu de prisión / Francisco Álvarez. — Xixón : vtp, 1998. — 127 p. ; 17 cm. — (Domus ; 10)
ISBN 84-89880-05-0
Álvarez González, Francisco
En poques pallabres / Francisco Álvarez. — Uviéu : Trabe, 1998. — 107 p. ; 20 cm. — (Incla interior ; 34)
ISBN 84-8053-087-1